A casa dos líos

O domingo 16 "A Mámoa Teatro" de Luou presentou na Casa da Cultura de Camporrapado unha comedia de enredo con tódolos ingredientes precisos para divertir: pelexas, equívocos, amor, odio e un final feliz ¡Como debe ser! 

I Festival de Nadal da Escola de Música Moderna de Boqueixón

Con escasos tres meses de andaina e 20 alumnos/as incritos, a Escola de Música Moderna de Boqueixón celebrou este domingo o seu primeiro festival no que o alumnado mostrou os coñecementos adquiridos nas distintas especialidades (canto, piano, trombón, saxo,…). Realmente emocionante ver aos pequenos ante o público. Todo un éxito!!! 

Exposición sobre a biodiversidade

EXPOSICIÓN DIDÁCTICA "GALICIA BIODIVERSIDADE"

Casa do Concello – Do 18 ao 21 de decembro- 9:00 a 14:30 h.

Esta exposición recibíu a visita de escolares de 3º, 4º 5º e 6º de Primaria do CPI “Antonio Orza Couto” e do grupo de Educación de Adultos (Graduado en ESO), contando cunha guía para unha maior comprensión da mesma.

A través desta exposición, os visitantes  tiveron a posibilidade de coñecer a diversidade de especies animais e vexetais que se poden atopar en Galicia, os ecosis­temas que habitan, e as múltiples formas de ameaza que poden afectar ás súas poboacións.

Nela atopamos  as principais especies galegas de flora e fauna, as súas características, os factores que poñen en perigo a súa supervivencia e as ferramentas que existen hoxe en día para a súa protección. Tamén se puido coñecer a importancia que ten a conservación das variedades xenéticas para a actividade humana, por exemplo, na alimentación, gra­zas á cría e cultivo de variedades galegas de maior calidade.

Mediante materiais expositivos, visitas guiadas, obradoiros e xogos, descubreuse o papel que se pode desempeñar na conservación da nosa biodiversidade, adoptando un papel activo na protección do medio na­tural que se atopa no noso entorno. 

Obradoiro de habilidades sociais

Noon, as habilidades sociais non son as formas para facerse socios dun club!!

Corrixir erros coma este e aprender técnicas para adestrarse nalgunhas das habilidades sociais máis importantes (escoita activa, empatía, asertividade…) foron os obxectivos procurados no Obradoiro de Habilidades Sociais impartido aos alumnos de 6º da E.P.O do CPI do Forte durante o mes de novembro!

Canda os froitos dos ourizos chegou a monitora pero aínda así o alumnado con moito agarimo pousou os coitelos de picar as castañas para o magosto e recibiron este taller con moi boa actitude e mellor participación! Foron catro sesións nas que se combinou a explicación teórica coa práctica por medio do role-playing, ou como dirían eles “obras pequenas” e “historietas”.

Valorada con éxito, a actividade espera levarse a cabo de novo nos vindeiros cursos!

Ciclo de teatro

Para  pasar un rato divertido  e………combatir o frío destas datas, ven ao teatro ¡!

O domingo día 2 deu comezo o Ciclo de teatro de outono da man do grupo de teatro Tira e afloxa de San Pedro de Vilanova (Vedra) coa obra “Donde vai o cabalo de Santiago” coa que pasamos un rato entretido e divertido.

De “teloneiros” contamos con Tira e afloxa juniors, un grupo de rapaces e rapazas de 3 a 10 anos, tamén de San Pedro de Vilanova, que bailaron unha coreografía do musical Grease. ¡Menudos Johns Travolta e Olivias Newton John!

Non esquezades as seguintes  citas:

-Casa de Cultura de Camporrapado: domingo 16 ás 17:30 h. o grupo de teatro A Mámoa de Luou (Teo) cunha obra que promete “A cada los líos” e o Festival de Nadal da Escola de Música Moderna.

-Local Social de Codeso: domingo 23  ás 17:30 h. Grupo de maiores de Boqueixón coa obra “Caldo e galiña” e grupo de Baile Moderno CPI “Antonio Orza Couto”.